Grebari berrekin zioten astelehenean eta, APAVI patronalaren jarrera ikusi ondoren, azaroan ere bost greba egun egitea erabaki dute langileek. Greba mugagabe bilakatzea ez dute baztertzen.
Bizkaiko autoeskoletako langileen mobilizazioa gaur, Bilbon. Argazkia: ELA
Luze doaz borrokan Bizkaiko autoeskoletako langileak, ekainean hasi baitzituzten lanuzteak eta udazkenera arte luzatu dira. Urriaren 25etik 29ra deitu dute grebara orain eta, sindikatuen arabera, "babes handia" izan du deialdiak. Lanuzteak ez ezik, manifestazio bat egin dute gaurkoan, Bilboko (Bizkaia) Pio Baroja plazatik APAVI patronalaren egoitzaraino.
Patronalarekin hasitako negoziazioak "blokeatuta" jarraitzen duela azaldu dute langileek; hala, grebari eustea erabaki dute gaur grebalariek. Izan ere, badira 11 urte azken lan-hitzarmena iraungi zenetik, eta ordutik hainbat izan dira langileek hitzarmen bat lortzeko egindako saiakerak.
Greba deialdi berria eta langileen eskaerak
Testuinguru horretan, beraz, azaroaren 2tik 5era lanuzte gehiago egingo dituztela esan dute, bai eta "mobilizazioak areagotzea" helburu dutela ere. Langileen eskaeren artean daude, besteak beste, soldaten erregularizazioa, soldaten arteko genero-arrakalarekin amaitzea, lanaldien murrizketa, ordutegien "arrazionalizazioa" eta erretiro partzialak.
