Europar Batasuneko Barne ministroek babes sendoa eman diote adin militarrean dauden gizon ukrainarrak behin-behinean babes-erregimen komunitariotik kanpo uzteko proposamenari. Babes-erregimen horrek estatu kideetan bizitzeko, lan egiteko eta ikasteko eskubidea ematen die errefuxiatuei. Joan den ostegunean Luxenburgon egindako bilera ofizial batean, gobernuko ordezkariek asilo-zuzentarau horren luzapenaren nondik norakoak eztabaidatu zituzten, 2027ko martxoan amaitzen baita formalki, eta gaur egun, gerragatik mugitu behar izan diren lau milioi pertsona baino gehiago babesten baititu. Orain eztabaidagai den aldaketak, ordea, aurreikusten du 23 eta 60 urte arteko gizonezkoei ez onartzea edo ez berritzea babes-eskaerak, beren jatorrizko estatuetan alde egiteko murrizketak baldin badaude indarrean, eta nahitaezko errekrutramendurako baldintzak betetzen baldin badituzte.
Suediako Migrazio ministro Johan Forssellek, bileraren amaieran, zehaztu zuen ordezkaritzen artean ia erabateko adostasuna zegoela babes-erregimenari jarraipena emateko, baina hainbat kasu salbuesteko kontsentsua ere bazegoela: zehazki, euren jatorrizko lurraldean mobilizazio militarrerako arauen mende dauden herritarrak. Forssellek ziurtatu zuen Europako Batzordeak "segurtasun osoz" sartuko duela klausula murriztaile hori bere hurrengo lege-proposamenean. Espainiako Estatuko ordezkaritzak adierazi zuen arren ez duela aldaketa begi onez ikusten, adostasun orokorra "zabala" zenez, Madrilek ez zuen bileraren norabide politikoa blokeatu.
Bestalde, Magnus Brunner Europako Migrazio komisarioak berretsi egin zuen Barne ministroen jarrera, Luxenburgoko bileraren ostean egindako prentsa-agerraldian. Bere esanetan, muga horiek ezartzeak "ez dio soilik Europako blokea kontrolatzeko borondateari erantzuten, baizik eta bat dator Kieveko agintariek frontean dituzten defentsa-gaitasunei eusteko egindako eskaera esplizituekin". Brunnerrek baieztatu zuen Europako Batzordeko zerbitzu teknikoek blokearen eskaerak "arretaz entzun" dituztela eta aurreikusten dutela datozen asteetan araudiaren proposamenaren behin betiko zirriborroa aurkeztea.
