Irango Errepublika Islamikoak proposamen sorta berri bat eman dio Pakistani, Islamabadek Teheranen eta Washingtonen arteko bake-negoziazioak suspertzeko egindako ahalegin diplomatikoei lotuta. Mugimendu politiko horrekin batera, Donald Trumpek areagotu egin du bere presio-erretorika, eta akordioa lortzeko premiaz ohartarazi du. Zehazki, joan den larunbatean, AEBetako presidenteak Truth Social plataforma erabili zuen mezu bat igortzeko: "Denbora amaitzen ari da eta azkar jokatu behar dute, bestela, ez da haien ezer geratuko".
Iran Nuances hedabideak jakinarazi duenez, Iranen proposamen berria formula hibrido bat da, Teheranek joan den astean aurkeztutako hamalau puntuko plana eta AEBetako administrazioak planteatutako baldintzak uztartzen dituena. Dokumentua Mohsin Naqvi Pakistango Barne ministroak jaso zuen aurreko larunbatean Irango hiriburura iritsi zenean, Teheranera egindako bidaia ofizialaren baitan.
Proposamenak eskualdeko su-etenaren lotura birformulatzen du; izan ere, Teheranek behin eta berriz esaten badu ere edozein akordio nuklearrek gerraren amaiera bermatu behar duela fronte guztietan, mekanismo mailakatu batzuk proposatzen ditu Washingtonek desarmatzean aurrera egiteko egindako eskakizunera egokitzeko, blokeatutako funtsak askatu edo beste neurri batzuk hartu aurretik. Proposamen horrek Irango Gobernuaren onespena du, Masud Pezeshkian Errepublikako presidenteak eta Mohamad Baqer Qalibaf Parlamentuko presidenteak zuzenean babestu baitute. Azken horrek esperientzia zuzena du prozesuan, apirilaren 11n eta 12an Islamabaden izandako aldebiko bake-elkarrizketen buru izan ondoren.
Washingtonen eskakizun maximalistak
Fars Irango albiste-agentziak zehaztu duenez, bake-prozesuan aurrera egiteko "bete beharreko" bost eskakizun nagusirekin erantzun zieten Estatu Batuek Iranen azken zirriborroari. Neurri horien artean, AEBek eskatzen zuten Iranek 440 kilo uranio aberastu "berehala" entregatu ditzala eta Irango programa nuklearra instalazio aktibo bakar batera mugatzea. Era berean, Fars-en txostenaren arabera, Washingtonek erabat baztertu du gerrako kalteengatiko edozein konpentsazio ekonomiko ordaintzea, bai eta atzerrian izoztutako aktibo irandarren %25 desblokeatzea ere, Iranek lehentasunezkotzat jo arren.
Geldirik daude negoziazioak
Iranen jatorrizko proposamenak, joan den astean aurkeztuak, baldintza batzuk jartzen zituen eztabaida nuklearrei ekiteko: gerra amaitzea, Iranen aurkako nazioarteko zigor ekonomikoak kentzea, eta Ormuzko itsasarte estrategikoaren gainean duen subiranotasuna esplizituki onartzea. Trumpek esan zuen "onartezinak" direla baldintza horiek, eta apirilaren 8tik indarrean dagoen aldebiko su-etena "oso ahula" dela gogorarazi zuen.
Teheranen hedabide ofizialek zabaldutako barne-analisiak eszeptizismo argia erakusten dute. Izan ere, iradokitzen dute Irango Gobernuak neurri batean Etxe Zuriaren baldintza zorrotzak onartuko balitu ere, Estatu Batuen eta Israelen esku-hartze militarraren mehatxuak ezkutuan jarraituko lukeela. Negoziazio-mahai formaletan blokeoa egon arren, Irango Kanpo Arazoetako ministro Abbas Araghchik New Delhiko BRICSen ministro-bileran baieztatu zuen bi herrialdeek komunikazio-bideak irekita dituztela eta mezuak "motel" trukatzen jarraitzen dutela.
