Koroatzean okupatutako hainbat lokaletara sartu dira Gasteizko Udaltzaingoa eta Espainiako Polizia, zenbait hedabideren arabera, "legez kanpoko egoeran dauden pertsonen bila". Bi atxiloketa izan dira.
FOTOGRAFÍA / Gasteiz Hoy
Gaur goizean, polizia-operazio bateratu bat egin dute Gasteizen (Araba) udaltzainek eta Espainiako Poliziako agenteek. Koroatzea auzoan, zenbait lokal okupatutan bizi dira hainbat pertsona migratu, eta haien kontra jo dute polizia-indarrek. Zenbait hedabideren esanetan, "legez kanpoko egoeran dauden pertsonen bila" jardun du Poliziak.
Gutxienez zazpi pertsona identifikatu dituzte sarekadan, eta atxilo eraman dituzte bi. Badirudi haietako batzuen egoera ez dagoela legeztatuta gaur egun, eta hori baliatu duela Espainiako Poliziak haiek jazartzeko.
"Bizikidetza-arazoak" eta "segurtasuna" argudiatuta, lokal horietan bizi diren pertsonen kontrako protestak egin dituzte azkenaldian auzoko hainbat bizilagunek, beste herri batzuetan ikusten ari garen modura.
