Erabaki horren testua gaur igorriko zaio Nafarroako Auzitegi Nagusiari, berrets dezan. Arabako, Bizkaiko eta Gipuzkoako neurriei buruz ostiralean hitz egingo du Labi batzordeak.
Santos Indurain.
Badirudi gaur-gaurkoz indarrean diren neurri murriztaile guztien indarraldia luzatuko duela Nafarroako Gobernuak, otsailaren 14ra arte gutxienez. Gobernuak prest du luzapena eskatzeko akordioari buruzko testua, eta gaur igorriko dio Nafarroako Auzitegi Nagusiko Administrazioarekiko Auzietako Salari, onartu dezan.
Santos Indurain Osasun sailburuaren arabera, helburua da "birusaren transmisioa eta eragina geldiaraztea eta murriztea, elkarrekintzan eta mugikortasunean esku hartuta". Izatez, urtarrilaren 31ra arte egon behar zuten indarrean abendu bukaeran onartutako neurriak; gehienbat, ostalaritza- eta aisialdi-lokaletako ordutegiekin eta aforoekin lotuta daudenak. Covid ziurtagiriaren derrigortasuna ere bere horretan mantenduko dute.
Labi, bihar
Arabari, Bizkaiari eta Gipuzkoari dagokienez, oraindik ez dago argi neurrien indarraldia luzatuko duten edo ez. Bihar arratsaldean bilduko da Labi batzordea, eta orduan aztertuko dute aukera hori, izatez, urtarrilaren 28an amaitzen baita abenduaren 28an onartutako neurri murriztaileen iraupena.
