Donostiako hainbat gunetan egingo dituzte estatuen joera autoritarioari loturiko hitzaldiak. Hona hemen xehetasun guztiak.
Bere burua aurkeztu eta hiru hilabetera, aurreneko jardunaldi politiko bat egingo du Euskal Herriko Kontseilu Sozialistak (EHKS). Martxoaren 16rako jarri du hitzordua, Donostian (Gipuzkoa): estatuen joera autoritarioari buruzko hainbat saio egingo ditu egun guztian zehar, Gipuzkoako hiriburuko zenbait gunetan.
Egitarau zehatzaren berri eman du jada EHKSk. 10:00etan izango da eguneko lehen hitzaldia, Loiolako udal pilotalekuan: Estatuen erreforma autoritarioa eta langileon eskubide politikoen aldeko borroka. Eguerdian, 12:30etik aurrera, bi hitzaldi izango dira aldi berean: "inperialismoari, gerrari eta genozidioari" buruzko hitzaldi bat egingo dute Donostiako Zentro Sozialistan (Mundaiz kalea, 4), eta faxismoaren inguruko beste bat Loiolako udal pilotalekuan, "erdi-mailako klase nazionalen gainbehera" ikuspegitzat hartuta.
Eguerdiko saioen ostean, 14:30ak aldera, bazkaria egingo dute. Bi gunetan banatu beharko dute bazkaltzeko, ordea: Aitor Ikastolan eta Donostiako Zentro Sozialistan. Horren ondoren, mahai-inguru batekin emango diete amaiera solasaldiei: "parlamentarismoa, hauteskunde-zikloa eta estatuen erreforma" landuko dituzte 17:30ean, Loiolako frontoian.
Hitzaldi guztiak amaitzean, 21:00etik aurrera, kontzertu bat ere izango da Zentro Sozialistan. Hiuzz, Borla eta Berandu Baino Lehen taldeak arituko dira.
➡️ Jardunaldi politikoak, martxoaren 16an, Donostian. pic.twitter.com/pVtTEDe2Qk
— Euskal Herriko Kontseilu Sozialista (@EHKSozialista) March 5, 2024
