2007tik erregistratutako daturik onenak izan zituen iaz Santander bankuak, etekina %18 handitzea lortu baitzuen. BBVAk inoiz baino irabazi handiagoa erdietsi zuen 2022an; %38 egin zuen gora.
Kutxabanken egindako margoketa bat.
2021. urteko emaitzekin alderatuta, irabazi handiagoak izan zituzten iaz Santander eta BBVA bankuek. 2022an, 2007tik lortutako daturik onenak izan zituen Santanderrek: 9.605 milioi euroko etekina, 2021ean baino %18 handiagoa. 2007an, 9.060 milioi euroko etekina lortu zuen. Iaz, "akzio bakoitzeko etekina %23 igo zen eta akzioko esku-dirutan emandako dibidendua, berriz, %16", Ana Botin presidenteak azaldu duenez. 2023an, gainera, joera gorakorra mantenduko delakoan dago banketxea, espero baitu "inflazioaren jaitsiera lehenesten jarraitzea banku zentralek eta gobernuek"; alegia, interes tasak igotzen.
BBVAk, bestalde, inoizko emaitzarik onenak erdietsi zituen 2022an. 6.420 milioi euroko irabazia eduki zuen iaz, 2021ean baino %38 handiagoa. Banketxearen arabera, "diru-sarreren igoerak ekarri du emaitza on hori". "Hazkunde urtea izan da guretzat. Inoizko etekin handiena lortu dugu,
kredituaren hedapena indartuta eta gure estrategian aurrerapauso
garrantzitsuak emanda; digitalizazioa, berrikuntza eta jasangarritasuna,
esaterako", esan du Carlos Torres Villa presidenteak.
