Greziako Parlamentuak urriaren 16an onartu zuen lan-erreforma antiproletario berri bat. Kyriakos Mitsotakis buru duen Demokrazia Berriko Gobernuak aurkeztu zuen neurria, sektore pribatuan lanaldia eguneko 13 ordura arte luzatzea baimentzen duena. Urtean 37 egunetan aplikatu ahal izango da, eta agintariek "borondatezkotzat" jotzen dute lanaldia luzatzeko aukera, lan egindako aparteko ordu bakoitzeko %40ko ustezko konpentsazioarekin.

Niki Kerameos Lan ministroak erreforma defendatu du, esanez "malgutasun handiagoa eskainiko diela sasoikako eskulan gutxi duten sektoreei", hala nola turismoari, horren menpe baitago Greziako ekonomia. Kerameosek bere burua desenkusatu du esanez "langileek enplegu partzial ugari bilatzea saihestuko" duela, "enplegatzaile bakar batekin diru-sarrera handiagoak ahalbidetuz". Gainera, azpimarratu du mantendu egingo dituztela astean 48 lanorduko eta urtean 150 lanordu estrako muga legalak, eta hitzeman du, teorian, ezingo dela langilerik kaleratu, lanaldia luzatzeari uko egiteagatik.

Hala ere, oposizioko sindikatuek eta alderdiek, hala nola Syrizak, Greziako Alderdi Komunistak eta PASOKek, ezezkoa eman diote neurriari, eta esan dute ia bi mende atzera egin dutela lan-legerian. Aurreko asteetan izandako bi greba orokorrek ez dute erreformaren onarpena gelditzea lortu, nahiz eta agerian geratu den ezinegon handia dagoela gizartean miseriazko soldatengatik eta Greziako proletalgoaren lan-indarraren esplotazio areagotuagatik.

Eurostatek %9,9an kokatzen du Greziako langabezia-tasa ofiziala, eta lanaldi luzeak izan arren, produktibitate nabarmen baxua du. Egoera horretan, Greziako patronalak Europako gainerako kideekin parekatu nahi du bere burua herrialdeko lehiakortasunari dagokionez, lan-merkatua "malgutuz" eta lanorduak luzatzeagatik kritikak piztuz. Dena den, sindikatuetako iturriek ohartarazi dutenez, erreformak aurrekari kezkagarri bat ireki du Europako langileriarentzat oro har, "lehiakortasun ekonomikoaren", "doikuntza-planen" eta behar militarren izenean lan-baldintzen okertzea jasaten ari baita.