Espainiako Estatuan, langileriak 8,4 urteko soldata gordina osorik erabili behar izan zuen 2025ean etxebizitza bat ordaintzeko. Beraz, hamasei hilabeteko soldatarekin berdindu daitekeen igoera bat izan zen iaz, 2024an erregistratutako datuekin alderatuta. Hala ondorioztatu du InfoJobs eta Fotocasa atariek elkarrekin egindako txosten batek. Salgai dagoen etxebizitzaren batez besteko prezioak %20,5eko urteko igoerarekin itxi zuen ekitaldia, metro koadroaren prezioa 2.879 euroan kokatuz.

Aitzitik, enplegu-plataforman eskainitako soldata gordinek %1eko "igoera" soilik izan zuten, eta urteko 27.336 euroko batez bestekoa ezarri zen. Monica Perezek, InfoJobseko Komunikazio eta Ikerketa zuzendariak, ohar ofizial batean adierazi du soldata-igoera hori "higiezinen sektoreak izandako goranzko bilakaeratik oso urrun geratzen" dela. Egoera horrek, Maria Matos Azterlanen zuzendari eta Fotocasako bozeramailearen esanetan, "bere historiako etxebizitzarako irisgarritasunaren krisirik larrienaren aurrean kokatzen du" Espainiako Estatua. Eta gaineratu du: "Biztanleriak ez zuen inoiz halako soldatarik eman behar izan higiezin bat erosteko".

Azterketak erakusten duenez, jabetza bat eskuratzeko beharrezko denbora areagotu egin zen hamazazpi autonomia-erkidegoetatik hamabostetan, 2024arekin alderatuta; Nafarroan eta Gaztela-Mantxan bakarrik mantendu zen beharrezko denbora hori. Madrilgo Erkidegoa finantza-ahaleginaren gorakadaren buru izan zen iaz, 34 hilabeteko igoera erregistratu baitzuen: 2024an hamabi urte inguruko soldata behar zen, eta 2025ean, berriz, hamabost urtekoa. Dena den, Balear Uharteak nabarmendu ziren egoiliarrek egoitza bat ordaintzeko denborarik luzeena behar duten lurralde gisa, 15,1 urteko soldata gordin osoa hartu baitzen beharrezkotzat higiezin bat lortzeko, artxipelagoko 27.967 euroko urteko batez besteko ordainsariaren arabera kalkulatuta. Hau da, hilean 2.331 euro inguru, hamabi zatitan banatuz gero, nahiz eta zifra horiek soldata ohikoenen oso gainetik dauden.