Gazako osasun-arloko 160 langile baino gehiago, medikuak eta paramedikuak barne, atxilotuta daude Israelgo Estatuaren espetxeetan, Healthcare Workers Watch (HWW) Gobernuz Kanpoko Erakundearen arabera. Osasunaren Mundu Erakundea (OME) "kezkatuta" agertu da osasun-arloko profesionalek jasaten dituzten atxiloketa-baldintzengatik eta abusuengatik, aske geratzea lortu dutenek askotariko torturak salatu baitituzte. Nazioarteko erakundeek legez kanpokotzat jotzen dituzte atxiloketa horiek; izan ere, nazioarteko zuzenbidearen arauak urratzen dituztela seinalatu dute, gatazketan medikuntzako langileak "babesten" dituztelako berez. Arau horiek betetzen ez dituztenak zigortzeko botere betearazlerik ez dago, dena den.

Hainbat lekukotasunek, Al-Shifa ospitaleko zuzendari Mohammed Abu Selmia bezalako medikuen testigantzak barne, muturreko abusuak eta tratu txarrak azaltzen dituzte, hala nola jipoiak, torturak eta elikagairik ez ematea. Salaketen arabera, atxilotuetako askori tratu ankerrak eman dizkiete eta muturreko espetxe-baldintzak ezarri dizkiete. Nazio Batuen Erakundeak (NBE) eta OMEk adierazi dutenez, horrek guztiak larriagotu egiten du Gazako krisi humanitarioa, atxilotutako ehunka mediku profesionalek ezin baitituzte sionistek erasotako herritarrak artatu.

Israelgo Estatuaren armadak atxiloketak defendatu ditu, "Israelen segurtasuna bermatzeko" eta "terroristak" auzipetzeko beharrezkoak direla argudiatuta. Hala ere, giza-eskubideen aldeko erakundeek eta nazioarteko adituek azpimarratzen dute praktika horiek Gazako osasun-sistemaren kolapsoan laguntzen dutela, berez egoera kritikoan dagoena jadanik, eta horrek ondorio larriak dakarzkiola palestinar biztanleria zibilari.