Atzo ere Donostia (Gipuzkoa) hartu zuen Ertzaintzak, Realaren futbol-partida baten harira. Realak gaueko 21:00etan neurtu behar zituen indarrak Paris Saint-Germainekin (PSG), eta agintaritzek "arrisku handikotzat" jo zuten partida. Horren ondorioz, Reale Arena futbol-zelai inguruko 32 taberna behartu zituzten, 15:00etatik aurrera, terraza kentzera; horretaz gain, Ertzaintzaren polizia-dispositibo izugarria izan zen arratsalde osoan zehar.

Iluntzean, Reale Arena estadio inguruan bildu ziren hainbat eta hainbat zale, eta sekulakoa izan zen Poliziaren presentzia. Realaren autobusa zelaira heldu zenean, harrera beroa egin zioten taldeari zaletuek, baina euren kontra oldartu zen gero Ertzaintza. Hainbatetan kargatu zuen Poliziak realzaleen kontra, eta istiluak eragin zituen.

Horren aurretik, goizean, Realeko dozenaka zale identifikatu zituen Ertzaintzak Donostian bertan. Agintaritzek (tartean Donostiako Udalak) zein komunikabideek erabat seinalatu eta kriminalizatu zituzten pertsona horiek, zeramaten babes-materiala zela-eta, besteak beste.

Joan den otsailaren erdialdean, Realak eta PSGk Parisen zeukatenean neurketa, PSGko hamabi zale faxista atxilotu zituen Poliziak: hainbat realzaleri eraso egiteko asmoa zuten.

Karga gehiago Donostian eta Bilbon

Iragan otsailaren 27an, Realak Mallorcarekin indarrak neurtu behar zituenean, berriz oldartu zen zaleen aurka Ertzaintza. Taldeari harrera egitea galarazi zien indarrez, eta euren kontra kargatu zuen: foam jaurtigaiak erabili zituen, besteak beste. Handik bi egunera, Bilbon (Bizkaia), Athleticeko zaleei eraso zieten ertzainek: Atletico Madrilen aurkako partidaren aurretik, zaleen kontra oldartu zen Polizia, San Mames estadio inguruan. Orduan ere ikaragarria izan zen polizia-dispositiboa.