Errotuladore batekin ikusi, eta urtarrilaren 29ko manifestaziorako propaganda egin izana leporatuta egin diote mehatxu Gasteizko ikasleari. Koldo Mitxelena institutuan, berriz, IAren propaganda galaraziko dutela adierazi diete ikasleei.
Gasteizko Ekialde institutua. Argazkia: @Edu_FdP
Gasteizko (Araba) Ekialde institutuko zuzendaritzak ikastetxetik kanporatuko duela esan dio IAko militante bati. Gasteizko IAk salatu du, errotuladore batekin ikusi zutenez, inongo frogarik gabe leporatu zizkiotela urtarrilaren 29an Bilbon (Bizkaia) egitekoa den manifestaziora deitzeko agertutako margoketak.
"Zuzendaritzaren autoritarismoa argia da", azaldu dute ikasleek bideo batean: "Horrelako jarrerek, beldurraren bitartez, askatasun politikoa mugatzea dute helburu". Gasteizen bertan, gainera, IAren propagandarik ez dutela onartuko adierazi diete militanteei Koldo Mitxelena institutuko zuzendaritzak.
Autoritarismoaren gorakadari eta askatasun politikoen murrizketari aurre egiteko, urtarrilaren 29an Bilboko kaleak betetzeko deia egin du Gasteizko IAk. Bilbon eta Iruñean (Nafarroa) izango dira GKSk antolatutako manifestazioak, Burgesiaren diktadura gelditu! Ofentsiba ekonomikoa eta politikoa borrokatu lelopean.
