Israelgo Estatuak eta Hamas buru duen Erresistentzia Palestinarrak presoen beste truke bat egin dute, nazioarteko hainbat ordezkarik bultzatutako su-etenerako akordioaren barruan. Sionistek 642 palestinar askatu dituzte, tartean, biziarteko kartzela-zigorrak edo zigor erraldoiak zituzten asko; eta Hamasek, berriz, lau gerra-presoren gorpuak entregatu ditu Gurutze Gorriaren bitartez. Aske geratutako preso palestinarrak Gazan eta Zisjordanian hartu dituzte senideek, eta 97 Egiptora erbesteratu dituzte jadanik, Al Jazeera-k jakinarazi duenez. Truke horrek otsailaren 27an hasi zen su-etenaren lehen fasearen amaiera adierazten du.

Akordioa herri palestinarraren aurkako sarraski-gerra baten erdian gertatu da: 2023ko urritik hona, gutxienez 48.348 palestinar erail dituzte sionistek Gazan, bertako Osasun Ministerioaren arabera. Nazioarteko bitartekariek ikuskatu dute azken trukea, eta akordioaren bigarren faserantz egin nahi dute, "ebazpen iraunkorrago bat" barne. Hala ere, Benjamin Netanyahu Israelgo Estatuko lehen ministroak barne-presioak ditu operazio militarrei berriro ekiteko.

Hamasek bitartekariei eskatu die bermatu dezatela sionistek akordioaren baldintzak betetzen dituztela, eta kritikatu egin du nazioarteko diskurtsoan "estandar bikoitz" gisa deskribatzen duena. Bestalde, askatutako palestinar askok azaldu dituzte kartzelan egon diren bitartean jasandako muturreko baldintzak. Eyad al-Saudi preso ohiak Reuters-i esan dio: "Eskuburdinak jarrita eta begiak estalita egon ginen 90 egunez. Gure poza ez dago guztiz beteta, oraindik gazteak badirelako kartzelan". Su-etenaren lehen fasea martxoaren 1ean amaituko da izatez.