Asier eta Youssef militante internazionalistak atzo geratu ziren aske Madrilen, epailearen aurrean agertu ostean. Joan den asteartean atxilotu zituzten biak, Espainiako Poliziako agenteek "terrorismoaren aurka" martxan jarritako operazio baten barruan (Informazio Komisaria Nagusiaren zuzeneko esku-hartzearekin), eta Auzitegi Nazionalera eraman zituzten jarraian. Jose Luis Calama epaileak erabaki du, ordea, bi bizkaitarrak aske uztea, kautelazko neurriekin izan arren: hamabost egunean behin aurkeztu beharko dira epaitegi batean, pasaportea kendu diete eta debekatu egin diete Espainiako Estatutik irtetea.
Atxiloketak astearte goizeko lehen orduan izan ziren, Bilbon eta Getxon. Txosten polizialek erakusten dutenez, atxilotuek Hezbollahrekin (Libanoko erakunde xiita) duten ustezko harremanean oinarritzen da akusazioa, eta Poliziak aurkeztutako kasuaren oinarri nagusia da ikertuek Telegrameko Frontflict izeneko kanal bat kudeatzen omen dutela. Horri lotuta, "erakunde terroristako kide" izatea egotzi diete, nahiz eta Iranekin Batek gogorarazi duen "loturak" izatea leporatzen dieten erakundeak, Hezbollahk hain justu, "izaera legala" eta "parlamentarioa" duela "jatorrizko herrialdean, Libanon".
Aipatutako informazio-kanalak Palestinako genozidioari buruzko informazioa zabaltzen du gaztelaniaz, baita Irango Errepublika Islamikoari eta Ekialde Hurbileko erresistentzia-taldeen jarduerei buruzkoa ere. Horiek horrela, atzo arratsaldean Bilboko Arriagan egindako agerraldi jendetsuan, Iranekin Batek salatu zuen "erresistentzia ez dela delitua" eta "inperialismo genozida salatzearen" kontrako kanpaina judizial eta mediatikoaren barruan gertatu direla Asierren eta Youseffen atxiloketak.
Artikulu bat prentsan, atxiloketen aurretik
Iranekin Batek (Iranekiko elkartasun-plataforma bat) eta Samidounek (preso palestinarren aldeko sare bat) baieztatu zuten bi atxilotuak beren antolakundeetako kide aktiboak direla. Iranekin Batek igorritako ohar batean esaten zenez, Espainiako Estatuko prentsa idatziko hainbat sektoreren aldetik, aste batzuk lehenago hasi ziren seinalamendu-kanpaina, gezurren zabalpena eta jazarpen mediatikoa, eta horri buru eman dio aste honetako operatibo polizial eta judizialak. Zehazki, El Confidencial egunkariaren duela gutxiko argitalpen batek zioen "terrorismoa" leporatzen zietela bi gazteei, baina artikulu horrek esplizituki onartzen zuen Auzitegi Nazionaleko epaile bakar batek ere ez zuela oinarri objektiborik edo arrazoizko zantzurik aurkitu ondorioztatzeko legez kontrako jardunbideren bat egon zitekeela.
Jomugan hartutako pertsonen ordezkaritza legalak eta defentsako bozeramaileek salatu dutenez, estatu-aparatuen prozedura hau, Espainiako Gobernuaren gidaritzapean koordinatua, Israelgo Estatuarekin elkarlanean kokatzen da, helburutzat duena Palestinako herriarekiko elkartasuna kriminalizatzea eta Libanoren okupazio militarra salatzen dutenak isilaraztea. Defentsako bozeramaileek emandako informazioaren arabera, agintaritzek bideratutako espedienteak seinalatu egiten du auzipetuek parte hartu izana, maiatzaren amaieratik ekainaren hasierara bitartean, Reza Zabib Irango enbaxadoreak eta kontsulatuek Hego Euskal Herriko hainbat hiriburutan eskainitako lau hitzalditan (Iranekin Batek salatu du ikerketaren abiapuntua izan direla hitzaldi horiek). Era berean, sumarioak jasotzen dituen inkriminazio gehigarri faltsuak gaitzetsi dituzte defentsek, Espainiako Vueltari boikota egiten saiatu izana eta desagertutako ETA erakundea babestea leporatzen baitiete, oinarririk gabe.
