Donald Trump Amerikako Estatu Batuetako presidentearen esanetan, indar estatubatuarrek "eraso oso arrakastatsuak" egin dituzte Irango instalazio nuklearren aurka Fordowen, Natanzen eta Isfahanen. Trumpek Irango Errepublika Islamikoari ohartarazi dio "helburu gehiago" ere badituztela Teheranek militarki erantzutea erabakitzen badu, eta operazioa arrakastatsutzat jo du egindakoa, Iranen "aberaste nuklearrerako gaitasuna" suntsitzea izanik asmoa, Al Jazeera-ren arabera.

"Iranentzat, bakea edo tragedia handi bat izango da. AEBek Irango instalazio gehiagori erasoko diete bakerik ez badago", adierazi du Trumpek Etxe Zuritik eskainitako prentsaurrekoan.

Irango Atzerri Ministerioak gaitzetsi egin ditu bonbardaketak: "nazioarteko zuzenbidearen urraketa larri" gisa seinalatu ditu, eta Iranek erasoari "indar guztiekin aurre egiteko" eskubidea duela defendatu du. AEBek "diplomaziari traizio" egin diotela eta "araurik eta etikarik gabe" jokatzen dutela salatu du Irango bozeramaileak, eta, gainera, Iranek ere misilak jaurti ditu Israelgo Estatuak okupatutako Palestinako helburu batzuen aurka, gutxienez 23 zauritu utziz. Programa nuklearrarekin jarraituko duela agindu du.

"Ondorio iraunkorrak"

AEBek egindako erasoak Ekialde Hurbilean gorakada handia eragin dezakeela uste dute nazioarteko analistek. Trita Parsi Quincy Instituteko presidenteordearen esanetan, ekintzak "ugaritze nuklear handiagoa" bultzatuko du eta Arma Nuklearrak Ez Ugaritzeko Ituna uztera bultza dezake Iran. Beste aditu batzuek, hala nola Adam Weinsteinek, Al Jazeera-n nabarmendu dute AEBak arriskuan daudela eskualdean gerra luze batean sartzeko.

Irandik eta Golkotik egindako txosten batzuen arabera, Fordoweko kaltea "azalekoa" izan da eta ez dute erradiazio ihesik atzeman, Irango agintarien eta Kuwaiteko Erradiazio Monitoreen Zentro Nazionalak azaldu dutenez. Guardia Iraultzaile Islamikoaren Indarrak, bestalde, baieztatu egin du irismen luzeko misilak eta erregai solidoa eta likidoa erabili dituztela Israelgo Estatuaren aurkako erasoetan. Eraso horiek kalte handiak eragin dituzte Haifa eta Tel Aviv hirietan.