Berehalako neurriak iragarri ditu, besteak beste, larrialdi-botereei, aldaketa sozialei eta ekonomikoei nahiz herrialdearentzako ikuspegi hedakor bati lotuta.
ARGAZKIA / EFE/EPA
Donald Trumpek atzo hartu zuen AEBetako 47. presidentea izateko kargua, bere bigarren agintaldiari ekinez. Kapitolioan egindako hitzaldi batean, "urrezko aro" baten hasiera iragarri zuen. Askapenaren Egun (Liberation Day) izendatu zuen atzokoa, eta bere aurreko presidente Joe Bidenen politikak eta "bere agendaren inguruko nazio bateratua" irauliko dituela esan zuen. Trumpek aditzera emandako lehen neurrien artean, nabarmentzekoak dira hegoaldeko mugan larrialdi nazionala deklaratzeko asmoa, milioika migratzaile deportatzekoa, eta ingurumenari eta aniztasunari buruzko araudiak ezabatzekoa.
Gobernu berriak indultua emango die Kapitolioaren aurkako erasoagatik zigortutakoei, eta The Washington Post egunkariaren arabera, genero-identitatearen politikak birdefinituko ditu, aitortza ofiziala sexu biologikora mugatuz eta trans identitateetarako lege-babesak ezabatuz. Aldi berean, Trumpek plan hedatzaileak ditu esku artean, besteak beste, baliabide naturalen erauzketa handitzea, Panamako kanala berreskuratzea eta "Marterako misioak gidatzea".
Kongresuko gehiengo estu batekin, Trumpek aurre egin beharko die bai bere erreforma handinahiak ezartzeko erronkari, bai oposizioko sektoreen kritikei, bai berak izendatutako kargudun batzuen aurkako demanda legalei. Zatiketak gorabehera, presidenteak ziurtatu du bere lidergoak "nazio indartsu eta aske baten batasuna eta berpiztea" sinbolizatzen dituela.
