Telefono mugikorretako kamerak eta mikrofonoak urrutitik aktibatzea baimentzen duen lege bat onartu dute Frantziako Estatuan

Aktualitatea / KONTROL SOZIALA

"Jada existitzen diren teknikak" direla aitortu du Justizia Ministerioak. Ikerketa askori eragiten die Éric Dupond-Morettik aurkeztutako Justiziaren lege-proiektuaren xedapen horrek.

ARGAZKIA / AFP

2023/06/08 19:10

Frantziako Senatuak argi berdea eman zion asteazken gauean lege-proiektu polemiko berri bati, telefono mugikorreko kamerak zein mikrofonoak urrutitik aktibatzea baimentzen duena. Justizia ministro Éric Dupond-Morettiren lege-proiektuaren 3. artikuluaren arabera, ordenagailuak edota internetera konektatutako bestelako gailuak urrutitik aktibatu ahal izango dituzte, ikuskatua den pertsona jakinaren gainean egon gabe.

"Delitu jakin batzuetarako geolokalizazioa denbora errealean eskuratzea" eta "irudiak eta soinua jasotzea" du helburutzat, eta, ustez, agintariek "terrorismo" edota "delinkuentzia antolatu" gisa izendatzen duten jarduera oro ikertzeko balioko luke. Dena den, bada bestelako arriskuez ohartarazi duenik: Observatoire des Libertés et du Numérique (OLN) erakundeak salatu duenez, neurriak "gehiegizko segurtasuna" dakar eta konektatutako edozein gailu "salatari potentzial" bihurtzen du.

Horrenbestekoa da legearen arriskua, ezker instituzionalak ere "neurriz kanpokotzat" jo duela xedapena. Hala ere, ez du legea indarrean sartzea eragozterik lortu. Ekologisten arabera, "zaintza orokor bati atea irekitzen dio". Dupond-Moretti ministroak azpimarratu duenez, "teknika horiek dagoeneko erabiltzen dira". Orain arte "balizak, mikrofonoak eta kamerak" instalatu behar omen zirela dio ministroak, eta, ustez, hemendik aurrera ere "epaile batek onartu beharko du".