Irailean izan zen bi olatudun erasoa: 40 lagun erail eta 3.500 zauritu zituzten. Israelgo Estatuko inteligentzia-zerbitzuek ezkutatu zituzten lehergaiak Libanora bidalitako milaka gailutan.
ARGAZKIA / El País
Egiletza nahikoa argi baldin bazegoen ere, Israelgo Estatuko lehen ministro Benjamin Netanyahuk oraintsu onartu du gailu elektronikoen bidezko atentatua sionistek egin zutela. Irailaren 17an eta 18an izan zen erasoa, bi olatutan. Batez ere Libanon, ehunka pertsona-bilagailu leherrarazi zituzten lehenengo, urrutitik. Gero, bigarren olatu batean, beste hamaika gailuk egin zuten eztanda; hala nola walkie talkie, telefono mugikor, ordenagailu eta irratiek. Denera, 40 pertsona erail eta 3.500 zauritu zituzten.
Komunikabide batzuek AEBetako funtzionario batzuk aipatu izan dituzte iturri modura, baieztatzeko Israelgo Estatuko inteligentzia-zerbitzuak izan zirela milaka gailutan lehergaiak ezkutatu eta Libanora bideratu zituztenak. Orain, Times of Israel egunkariak jaso du Netanyahuren aitorpena: "Defentsa Ministerioko goi-kargudunek nahi ez zuten arren, bilagailuak erabiliz operazioa egin genuen". Atentatua baimendu zuela jakinarazi du.
Eraso kriminala sionistek egin zutela onartzeaz gain, Hezbollahko buru Hassan Nasrallah ere haiek erail zutela esan du lehen ministroak, inpunitate osoz hori ere. "Hezbollahko burua zena paretik kendu" zutela adierazi dio Netanyahuk komunikabide berari.
