Nou Barrisen etxe-kaleratze bat burutzean atera du pistola. Operazioa "arduragabea, paranoikoa eta arauz kontrakoa" izan zela salatu dute Nou Barriseko Etxebizitza Sindikatuak eta Alerta Solidàriak.
Mossos d'Esquadrako polizia batek suzko arma erakutsi du Nou Barriseko (Bartzelona) Verdum auzoan egindako etxegabetze batean. Herenegun izan ziren gertakariak, eta maizterrek jarritako kamera batek bete-betean harrapatu zuen une hori. Nou Barriseko Etxebizitza Sindikatuak eta Alerta Solidària kolektiboak salatu dutenez, polizien esku-hartzea "arduragabea, paranoikoa eta arauz kontrakoa" izan zen desalojoan. Mossoak arma zorrotik atera zuen momentuan, etxe-kaleratzea burututa zegoen jadanik, eta ez zegoen inor Poliziak hustutako etxean.
Duela bi egun etxegabetutako bi maizterrak, Denis eta Yolanda, iruzur baten biktima izan dira. Etxearen jabe legala izatearen plantak egin zituen iruzurgile batek, eta horrela sartu ziren pisura. Egiatan, baina, Anticipa Real Estate korporazioa da etxebizitzaren jabea, AEBetako Blackstone funtsaren filial bat. Etxegabetze-prozesuari ekin zion hark.
Nou Barriseko Etxebizitza Sindikatuak salatu duenez, horrelako interbentzio polizialak, polizia-indarren presentzia itogarriarekin batera, bereziki ikusgarriak izan dira Sants, Sant Gervasi, Trinitat Vella, Poble Sec edo Reusen oraintsu izandako etxe-kaleratze batzuetan.
