Aktualitatea
/
INDARKERIA MATXISTA
Lizarran bi emakumeri eraso zien gizon bat zigortu dute
Gizonak 2020an egin zizkien sexu-erasoak Lizarrako (Nafarroa) diskoteka batean. Epaileak zigorra arintzea erabaki du, erasotzailea mozkorra zegoela argudiatuta.
2021/06/07
10:20
Iruñeko (Nafarroa) epaitegi batek urtebeteko espetxe zigorra ezarri dio 2020an Lizarrako (Nafarroa) diskoteka batean bi emakumeri sexu-erasoak egin zizkien gizon bati, eta 2.000 euroko kalte-ordainak ere ordaindu beharko dizkie erasotzaileak. Horretaz gain, ezingo du bi urtean emakume horiengana hurbildu ez eta haiekin harremanetan jarri. Sexu-erasoak
egin zizkieten unean, euren burua defendatu zuten bi emakumeek.
Gizona mozkorra zegoela argudiatuta, zigorra arintzea erabaki du epaileak azken ebazpenean; hortaz, ez dute kartzelaratuko epaitegiak hartutako neurriak errespetatu eta beste
deliturik egiten ez badu.
Lizarraldeko Itaiaren oharra
Ebazpenaren harira, sare sozialen bitartez ohar bat kaleratu du Lizarraldeko
Itaiak. Albistea "kasu isolatu bat" ez dela eta "egoera ohikoa" dela salatzeaz gain,
"gaur egungo jai ereduak emakume langileonganako zapalkuntza elikatzen" duela
azpimarratu dute. Horren aurrean, "horrelako gizonen profilei" aurre egiteko beharra aldarrikatu dute, "baita jarrera horiek isiltzen
edo elikatzen dituzten lagunei" ere. Bestalde, nabarmendu dute alkoholaren edo
beste droga batzuen kontsumoak ez dituela inola ere erasoak justifikatzen edo arintzen.
Komunikabideekin ere kritikoak izan
dira Itaiako kideak; izan ere, haien arabera, "xehetasun hutsalak eta morbosoak" ematen
dituzte. Hori dela eta, gertatutakoa legitimatzea eta
emakume langileenganako "zapalkuntza betikotzea" egotzi diete hedabideei.
EZ DAGO IRUZKINIK
