Erasotzaileetako bat atxilotu dute, eta beste lau identifikatu dituzte. Faxistek gutxienez hiru realzale zauritu zituzten labanaz aurreko asteazkenean.
Hilketa saiakera egotzita, Lazioko bost jarraitzaile faxista atzeman dituzte momentuz. Haietako bakarra mantentzen dute atxilo, gainerako laurak aske utzi baitituzte jadanik, karguekin. Antza denez, bideo-zaintza kamerek eta bizilagunek hartutako bideoak aztertuta identifikatu dituzte bost erasotzaile horiek. Badirudi, gainera, odol-arrastoak aurkitu dituztela haien arropetan. Italiako Poliziak dio, denera, hamar pertsona dituela identifikatuta, Realeko jarraitzaileen kontrako erasoarengatik.
Atxilotuta segitzen duen erasotzailearen kasuan, badirudi "objektu bat" eusten eta realzaleei eraso egiten ageri dela bideoetan. Italiako komunikabide batzuen arabera, 24 urte ditu eta Lazioko jarraitzaile ezagun baten semea da: Ettore Abramo Pluto. 2019an atxilotu zuten narkotrafikoagatik.
Eraso faxista aurreko asteazkenean
Realak aurreko ostegunean jokatu zuen Erroman, Lazioren kontra. Realeko jarraitzaile ugari bertaratu ziren aurreko egunetan, eta partidaren bezperan, Monti auzoan zirela eraso zieten Lazioko faxistek: modu antolatuan jo zuten realzaleen kontra 80 inguruk, askotariko armak hartuta. Realeko hainbat jarraitzaile zauritu zituzten, horietatik hiru, labanaz sastakatuta. Badirudi ospitaleratuta jarraitzen dutela bik, eraso faxistan jasandako zauri larriak direla-eta.
