Greba mugagabean daude Murgako Tubos Mecanicos Norteko langileak, "lan baldintza duinen alde"

Tubacex taldearena da lantegia, eta 45 egun daramate greban dagoeneko. Erantzun baikorrik jaso ez izana salatu dute.
Argazki Nagusia
Argazkia: ELA
2020ko martxoaren 25a

Aiaraldea-k jakinarazi duenez, gaur, martxoak 25, greba mugagabean 45 egun bete dituzte Murgako (Aiara, Araba) Tubos Mecanicos Norteko beharginek. Tubacex taldearena da lantegia, eta otsailaren 11n ekin zioten grebaldiari bertako langileek, "lan baldintza duinen" defentsan eta, zehazki, soldata igoera eskatzeko. Grebalariek nabarmendu dutenez, Tubacexekoek baino baldintza kaskarragoak dituzte.

Enpresaren kanpoaldean aritu dira mobilizatzen greban hasi zirenetik, baina larrialdi eta salbuespen egoera dela-eta, hango karpa kendu eta etxean dira egunotan. Salatu dute oraindik ez dutela zuzendaritzaren erantzun baikorrik jaso.

Tubacex taldea aipatuta, gogorazi beharra dago bi langile erail zituztela iaz Amurrioko fabrikan, 25 eta 59 urtekoak.