Adinetako egoitzetako emakume langileek greba-aldi berri bat abiatu dute gaur, Gipuzkoan

Urriaren 18ra arte iraungo duen greba honekin, patronalaren eta adin egoitzen artean adosturiko hitzarmena betearazi nahi dute langileek.
Argazki Nagusia
Argazkia: @erresidentziak
2019ko irailaren 19a

Gaur, osteguna, greba-aldi berria hasi dute Gipuzkoako adin egoitzetako emakume langileek. Adierazi duten bezala, 30 egunez egingo dute greba, nahiz eta berau luzatzeko aukera zabalik uzten duten sektoreko lan baldintzak hobetu ezean.

Langileek elkarretaratzera deitu dute gaurko, 11:30ean Donostian (Gipuzkoa), Gipuzkoako Foru Aldundiaren aurrean.

Bi urtez borrokan

Badira bi urte adin egoitzetako hitzarmena blokeaturik dagoela. 88 greba egun egin dituzte langileek pasa den ikasturtean, eta udako negoziazio mahaiaren osteko emaitza urriak direla-eta, "borroka azkeneraino eramateko prest" daude. Deialdi berriarekin, guztira, 118 greba egun izango lirateke.