Maiatzean lan-istripu bat izan zuen Donostiako taberna batean lanean ari zen behargin batek, eta kontraturik gabe ari zenez, kaleratu egin zuten eta ez zioten baja ordaindu. Langile Autodefentsa Sarearengana jo zuen langileak, eta nagusiek zor zioten dirua ordaintzea lortu dute.
Donostiako (Gipuzkoa) Kontseilu Sozialistak jakinarazi duenez, lan-gatazka bat irabazi du Langile Autodefentsa Sareak. 20 urteko langile bat Donostiako taberna batean hasi zen lanean joan den maiatzaren 23an, kontraturik gabe. Lan-istripu bat izan zuen hiru egun beranduago, eta kontraturik ez zuenez, tabernako nagusiek ez zioten legezko baja hartzen utzi, ez eta horri lotutako eskubiderik bermatu; esaterako, ez zioten baja egoera ordaindu. Horretaz gain, kaleratu egin zuten une horretan, eta beharginak ezin izan zuen lanik egin istriputik sendatu bitartean.
Donostiako Langile Autodefentsa Sarearekin harremanetan jarri zen langilea, eta borrokari ekin zioten orduan. Azkenean, nagusiek langileari zor zioten zenbatekoa ematea lortu dute: bajari lotutako kalte-ordainak nahiz lanik egin gabe igaro behar izan zuen denborarengatiko kalte-ordainak ordaindu dizkiote.
Kontseilu Sozialistako kideek azaldu zutenez, nagusiek, hasieran, uko egin zieten Langile Autodefentsa Sareak eta kaltetutako langileak egindako eskaerei. Gerora, ordea, onartu egin dituzte haiek egindako eskakizunak.
"Ezinbestekoa da halako egoerei erantzutea. Nagusien inpunitatea eta proletalgoaren babesgabetasuna borrokatzeko defentsa mekanismoak sortzea dagokigu, horiek langileriaren antolakuntza politiko independenterako baliatzeaz gain", seinalatu du Kontseilu Sozialistak.
π΄π΅ LANGILE AUTODEFENTSA SAREA
β Kontseilu Sozialista Donostia (@Kontseilua_Don) July 17, 2022
πππ‘ πππ§ππππ πππ§ ππ₯πππππ ππ¨ππ¨
Kontraturik gabe lan istripua jasan ondoren, nagusiek zor zizkioten 2000 eurotik gora ordaintzea lortu dugu. pic.twitter.com/VIkm6QjByS
