Irabaziak bikoiztu ditu Repsolek, erregaien prezioen igoerari esker

Aktualitatea / ERREFORMAK

Enpresaren irabazi garbia %114,8 hazi da 2022ko lehen lauhilekoan, iazko zifren aldean. Repsolek 1.392 milioi euro poltsikoratu ditu orotara, petrolioaren eta gasaren salneurrietan 2008tik ikusi gabeko igoerek bultzatuta. Espainiako Gobernuak ezarritako deskontu orokorrak "mesede" egin diola aitortu du Repsolen administrazio kontseiluak.

2022/05/04 17:50

Repsol enpresak bere mozkinak bikoiztu ditu 2022. urtearen lehen hiruhilekoaren buruan, 1.392 milioi euroko irabaziak izatera iritsita. Petrolioaren eta gasaren prezio altuak probestuz, 50 milioi akzio berrerosi ditu aurten, eta ez du gehiago eskuratzea baztertzen, baldin eta aparteko irabaziak metatzen jarraitzen badu.

2008tik ikusi gabeko maximoak ukitu dituzte hidrokarburoen prezioek aurtengo lehen hiruhilekoan. Halaxe igo dira petrolio enpresa ugariren irabazi garbiak, Repsol tartean. Haren mozkinak %114,8 hazi dira, 2021eko sasoi beraren aldean.

Akzioen berrerosketa

Kontuok aurkeztu ondoren, enpresaren burtsako akzioak %10,65 igo ziren joan den astean. Urtarriletik hona, berriz, %37 igo dira. Horri guztiari esker, Repsolek 50 milioi akzioren berrerosketa aurreratu du (bere kapitalaren %3,5). Berez, 2022ko azken hiruhilekoan edo hurrengo urteko lehen hiruhilekoan egingo zuela iragarri zuen; orain, ordea, urtea amaitu baino lehen egingo duela esan du.

Josu Jon Imaz kontseilari delegatuaren hitzetan, "ez dira azken berrerosketak izango". Akziodunen batzarra egingo dute datorren maiatzaren 6an, eta proposamen bat bozkatuko dute orduan. Onartuko balitz, Repsolen kapitalaren %10erainoko tituluen berrerosketak edo amortizazioak onartzeko baimena emango liokete administrazio kontseiluari.

Erregaien deskontuek mesede

Espainiako Gobernuak neurri "aurrerakoi" gisa aurkeztu badu ere, erregaiei ezarri dien deskontu orokorrak ez dio hazkurarik txikiena ere eragin Repsoli; alderantziz. Imazek berak aitortu duenez, "ez ditu kostu gisa ikusten" deskontu horiek, izan ere, "merkaturatzearen arloan digitalizazioa bizkortu" dutela ohartarazi du. Deskontu orokorrak Waylet aplikazioaren erabiltzaileen ugaritzea ekarri duenez, "izugarri" igo omen dira hango salmentak, Imazen hitzetan.

Beraz, apirilaren 1ean indarrean jarri zen deskontuak bigarren hiruhilekoan "nolabaiteko eragina" izango duela onartu arren, "erregaiak merkaturatzeko negozioa modernizatu eta handitu" egingo dela aurreikusten dute.

Emaitza "garbiak"

Ekonomialariek "emaitza garbi doitu" gisa izendatzen duten adierazlea ere bikoiztu egin du petrolio-enpresak, %124,2ko emaitzarekin. Neurgailu horrek "negozioen martxa modu zehatzagoan" aztertzen du, ondare garbitik harago begiratuz. Beraz, kalkulu horrek emaitza apalagoak izan ohi ditu. Repsolek, bada, 1.056 milioi euroraino bikoiztu zuen neurgailu hori ere.

Esplorazioa eta Ekoizpena delakoa izan da gehien nabarmendu den arloa. Espainiako Estatutik kanpo garatu da jarduera hori guztia, eta aipatutako emaitza garbi doituaren %69 ekarri zuen, aurreko emaitzak %123,5 inguru bikoiztuz, 731 milioi eurora iritsita.

Gasolindegietako irabaziak

Gasolina-zerbitzuguneei lotutako atalak %5 inguruko ekarpena egin zion emaitza garbi doituari. Hala, 2021eko lehen hiru hilabeteetakoa baino 27 milioi euro handiagoa izan da; COVID-19aren testuinguruko salbuespen neurri gehienak bertan behera geratu eta Espainiako Estatuko gasolindegietan salmenta gehiago lortu ziren hartan baino gehiago, hain zuzen ere.

Industria

Repsolen arlo industrialak hirukoiztu egin zuen bere emaitza (%223,3) 2021eko lehen hiruhilekoaren aldean, eta 236 milioi eurora heldu zen. Hazkunde horretan funtsezkoa izan zen birfintzearen negozioa; horren emaitza operatiboa aurreko urteko aldi berekoa baino 334 milioi euro handiagoa izan zen.