2025eko udari buruzko Deustobarometroaren emaitzak argitaratu ditu jada Deustuko Unibertsitateak, eta ikus daitekeenez, Araban, Bizkaian eta Gipuzkoan kezka sozialen aurreneko postuan dago etxebizitzarako sarbidea. Hain justu, inkesta egin dutenen %43,9k nabarmendu dute kezka nagusi gisa. Aurreko seihilekoko emaitzekin alderatuta, gora egin du ardura horrek, hiru puntu inguru.

Bestalde, masa-komunikabideek eta sare sozialek indartutako olatu erreakzionarioaren barruan, igo egin da "delinkuentziari" eta immigrazioari buruzko kezka ere, ia-ia podiumean sartzeraino. Izan ere, EAEko kezka sozialen laugarren postuan dago "delinkuentziatzat" jotakoa, inkestatuen %24,7k seinalatu baitute arazo nagusi gisa; eta bosgarren postuan dago immigrazioa, %22,4k lehen mailako arazotzat identifikatu ostean.

Askok, gainera, kolokan jartzen dituzte migratutako pertsonen oinarrizko eskubideak: %40k uste dute mugatu egin beharko litzatekeela haien osasun-arreta, eta ia %60 dira prestazio sozialekin berdina egin beharko litzatekeela pentsatzen dutenak. Horrez gain, %17,4k baino ez dute defendatzen pertsona migratzaile guztiek izan beharko luketela sarbidea babes ofizialeko etxebizitzetara.

Bigarren eta hirugarren postuak: osasungintza eta bizitzaren garestitzea

Etxebizitzarekiko, "segurtasunarekiko" eta immigrazioarekiko egonezina gora doazen bitartean, behera egin du osasungintzarekiko kezkak, nahiz eta bigarren postuan egon. Sei hilabeteko epean, %41,8tik %36,2ra jaitsi da auzi hori nabarmendu dutenen ehunekoa. Kezka nagusien hirugarren postuan eta podiuma osatuz dago, gainera, prezioen gorakada: %34,4k azpimarratzen dute auzi hori.

Egoera ekonomikoarekiko ikuspegia eta neurriak

Deustobarometroak jasotzen duenez, bi puntu jaitsi da EAEko egoera ekonomikoa "ona edo oso ona" dela uste dutenen portzentajea, %46raino. Egoera "erdipurdikoa" direla iritzi diotenek gora egin dute, %43ra. Gainera, inkestatuen %36,8k diote aisialdiari lotutako gastuak murriztu behar izan dituztela, eta %28,1 dira berokuntzaren eta argindarraren gastuak murrizteko neurriak hartu behar izan dituztenak.

Maiatzaren 29tik ekainaren 7ra bitartean egin zuen azterketa Deustuko Unibertsitateak, EAEko 1.000 pertsona inguru elkarrizketatuz.