Gela txiki batean pilatuta eta 24 orduz kontrolatuta izan dituzte proxenetek.
27 eta 36 urteko bi emakume atxilotu zituzten ostiralean Getxon (Bizkaia), beste hiru emakume prostituzioan aritzera behartzeagatik. Itxura denez, iazko irailean hasi zen esplotazio-sare horri buruzko ikerketa, eta proxenetek miseriazko baldintzetan zituzten biktimak: lortutako diruaren %50 eman behar zieten esplotatzaileei, 3,5 metro koadroko gela batean pilatuta bizi ziren, eta 24 orduz kontrolatzen zituzten, kontrol-kamera baten bidez. Egunean bi orduz baino ez zieten uzten etxetik irteten.
Prostituitzera behartzea, droga-trafikoan aritzea eta baimenik gabe farmakoak saltzea leporatzen diete bi atxilotuei, drogak eta erekzioaren disfuntzioari aurre egiteko substantziak ere saltzen baitzituzten. Hegoamerikarrak dira bai proxenetak bai biktimak.
