Abenduaren 27an Espainiako Auzitegi Nazionalean deklaratu beharko dute, "horrek espetxeratua izateko duen arriskuarekin". Iaz beste kausa bat zabaldu ondoren, 2002ko ekintza batzuk leporatzen dizkiete orain.
Ruben Gelbentzu eta Jon Lizarribar, 2014an, espetxetik ateratzen.
Iaztik baldintzapeko askatasunean daude Ruben Gelbentzu eta Jon Lizarribar preso politiko ohiak, Espainiako Auzitegi Nazionalak auzi berri batean inputatu ondoren. Orain, beste auzi bat ere ireki dietela jakinarazi dute, eta abenduaren 27an deklaratu beharko dute Auzitegi Nazionalean, "horrek espetxeratua izateko duen arriskuarekin". ETA erakundearekin lotuta, 2002ko ekintza batzuk leporatzen dizkiete.
Biei elkartasuna agertzeko, giza-kate bat egingo dute bihar, larunbata, Andoainen (Gipuzkoa). 12:30ean izango da mobilizazioa, eta asanblada informatibo batekin amaituko dute.
2013an atxilotu zituen Guardia Zibilak Gelbentzu eta Lizarribar, eta 2014an irten ziren espetxetik. Aurrez ere preso eduki zituzten biak. Lizarribar 2004an atxilotu zuen Frantziako Poliziak, eta bost urtez eduki zuten preso, Espainiako Estatura entregatu aurretik. Gelbentzu, berriz, 1990eko hamarkadan bi urtez eduki zuten espetxean, eta 2003an ere atxilotu zuen Guardia Zibilak.
