Hainbat norbanakok sare sozialetan eman dute Iruñeko (Nafarroa) Alde Zaharrean jazotakoaren berri: gaur, apirilak 13, gazte bat lurrera bota eta atxilotu du Espainiako Poliziak, Jarauta kalean.
Bizikletan zihoan gaztea, eta lekukoetako baten arabera, bere atzetik joan dira poliziak. Kale erdian trebesean jarri dira autoarekin, eta orduan, gaztea lurrera jaurti, besoetatik heldu eta eskuburdinak ipini dizkiote. Espainiako Poliziaren auto gehiago bertaratu dira Jarautara, eta atxilo eraman dute.
Balkoietatik protesta egin dute gertatutakoa ikusi duten hainbat bizilagunek. Azaldu dutenaren arabera, "Viva España" oihuekin erantzun diete poliziek megafonotik.
