Gaur, apirilak 20, Beasaingo (Gipuzkoa) eta Irungo (Gipuzkoa) lantegietako ateak ireki ditu berriro CAF trenbideetako sektoreko enpresak. Zuzendaritzak eta langile batzordeak hainbat neurri adostu dituzte, eta sartzeko zein irteteko ordutegiak moldatu dituzte, "arrisku-faktoreak" medio. 100 langileri neurri bereziak ere ezarri dizkiete.

Zuzenean emango diote hasiera jardunari, Beasaingo fabrikako laugarren atalean izan ezik. Eremu guztietatik behargin gehien batzen dituen atala da; enpresa osoko 3.000 langileetatik, 700. Bertan, beraz, modu mailakatuan hasiko dute ekoizpena: gaur langileen erdia sartuko da lanera, eta beste erdia, asteazkenean eta ostiralean, hilak 23 eta 25.

16 egunez itxita egon da enpresa, eta horietatik 13 egun "berreskuratu" beharko dituzte beharginek. Beste hiru egunak, antza, egindako aparteko orduetatik deskontatu edota ordaindutako lizentzia gisara ordainduko dizkie CAFek.

Horrekin batera, aldi baterako gutxienez 100 langile kontratatzea adostu dute.