Etxea garbitzeko lana eskaini ostean, bertara eraman eta sexu-erasoa egin zion 64 urteko gizonezkoak. Aurrekariak ditu antzeko erasoengatik.
Gasteizen (Araba), lan-eskaintza faltsu batez baliatuta eraso dio emakume bati gizonezko batek. Aurreko asteazkenean gertatu zen: Interneteko plataforma baten bidez lan bila ari da emakumea, eta etxe bat garbitzeko eskaintza jaso zuen. Bera kontratatu nahi omen zuen gizonarekin hitzordua jarri zuen, Gasteizko taberna batean, eta horren ostean joan ziren etxea ikustera; ustez, hura garbitzea baitzen gizona eskaintzen ari zitzaion lana.
Bertara iritsi zirenean, baina, ondoezik eta galdurik sentitzen hasi zen emakumea, eta 64 urteko gizonezkoak orduan eraso zion sexualki. Biktima berriz ere onera itzuli zenean, alde egitea lortu zuen, minez gorputzean. Hurrengo egunean jarri zuen salaketa bat jasandako erasoarengatik, eta ostiralean atxilotu zuten erasotzailea. Aurrekariak ditu antzeko sexu-eraso batzuk direla-eta, bai EAEn bai bertatik kanpo.
