Igandean, Sansomendin egin zuten protesta Voxen kontra, eta horri lotuta atxilotu zituzten astelehenean bi lagun. Atzo beste hiru pertsona eraman zituzten atxilo Bilbon, arrazoi berdinarengatik.
ARGAZKIA / Vox alderdiko kideak atzo, Galdakaon.
Vox alderdi faxista Gasteizko (Araba) Sansomendi auzoan izan zen aurreko igandean, hilaren 21ean, hauteskunde-propaganda banatzen. Faxistei aurre egin zieten hainbat lagunek, eta kalez jantzitako bi polizia-agentek esku hartu zuten; Espainiako Poliziakoak ziren.
Horren harira, atxiloketak izan ziren hurrengo egunean, astelehenean: gutxienez bi pertsona eraman zituen atxilo Espainiako Poliziak, Voxeko kideei eraso egitea leporatuta. Aske geratu dira jada.
Hiru atxilotu Bilbon
Bilbon (Bizkaia) ere hiru pertsona atxilotu zituzten atzo, asteartean, arrazoi berdinagatik. Maiatzaren 8an, Errekalden izan ziren Voxeko faxistak, hauteskunde-propaganda egiten. Euren kontra egin zuten protesta hainbat pertsonak, eta, horren harira, hiru lagun atzeman zituen atzo Espainiako Poliziak. Arratsalderako utzi zituzten aske.
