7.500 behargin inguru daude soldatapean Nafarroako garbiketa sektorean. Gaurtik ostiralera bitartean greba egitekoak ziren, lan-hitzarmenari lotuta egin dituzten aldarrikapenen defentsan. Hala eta guztiz ere, grebara deitu zuten sindikatuetatik bik, CCOOk eta UGTk, atzo sinatu zuten bost urterako aurreakordio bat patronalarekin, eta bertan behera utzi dute greba deialdia.
Akordio horren arabera, hilabete honetatik aurrera %2,5 igoko lituzkete langileen soldatak
Gaur, baina, ehunka langile elkartu dira Iruñean (Nafarroa). Adierazi dute ez daudela ados lan-hitzarmenaren gaineko aurreakordioarekin eta jasotzen dituen baldintzekin; besteak beste, izoztu egiten direlako 2019ko eta 2020ko soldatak, ez direlako bajak %100ean lortzen, eta are gehiago malgutzen duelako ordu osagarrien handitzea.
Nafarroako hiriburuko kaleetan mobilizatu dira beharginak, eta nabarmendu dute "traizio" egin dietela CCOO eta UGT sindikatuek, grebarako "dena prest" zegoenean, gainera.
