Pasa den asteartean, laugarren greba egunarekin, 80 autobus sabotatu zituzten EMBko langileek. Hitzarmen berri baten alde ari dira borrokan eta, hala, itunaren aldeko aldarrikapenez bete zituzten ibilgailuak. Aparkabisaren aparkalekuan egin zuten sabotajea; Ezkerraldeko zein Meatzaldeko autobusak gordetzen dituzte hor.
2020an agortu zen hitzarmena eta, pandemia garaia zenez, itun berria "atzeratzeko" erabakia hartu zuen enpresa batzordeak. Eraberritu gabe egon da ordutik eta, langileen ordezkariek eta enpresako zuzendaritzak bilerak egin dituzten arren, blokeatuta daude negoziazioak. Langileek salatu dutenez, irailean hautsi ziren elkarrizketak, eta beharginek grebari ekin zioten urriaren 25ean. Geroztik lau greba egun egin dituzte Meatzaldeko eta Ezkerraldeko langileek eta lanuzteetara batuko dira Txorierriko, Enkarterriko eta Lea-Artibaiko langileak ere.
Batzordea, ekimenen aurka
Sabotaje-ekintzen aurka azaldu da Juan Carlos Gonzalez langile batzordeko CCOO sindikatuko burua, eta azpimarratu du ez dituela "inoiz defendatuko" mota horretako ekimenak. Hala ere, esan du ez dela kalte materialik eragin. Bestalde, beharginen greba "isilarazia" izan dela salatu du, "erabiltzaile askori eragiten dion arren".
