Espainiako Estatuko jakien merkatuan 1994tik ikusi den zifrarik altuena da. Inflazioaren indize orokorrak %6an jarraitzen du, eta azpiko inflazioak, berriz, %7,6an. Supermerkatuek irabaziak handitzen jarraitzen dute bitartean.
Elikagaien inflazioak errekorrak eta poltsikoak hausten jarraitzen du Espainiako Estatuan. %16,6ra iritsi zen otsailean, Espainiako Estatistika Institutuak (INE) berriki argitaratutako datu eguneratuen arabera. Urtarrileko %15,4ko zifra baino altuagoa da hori, bai eta abenduan erregistratutako %15,7ko zifra baino gehiago ere. Are: inoizko markarik handiena da, 1994. urtean zenbatzen hasi zen indizeari dagokionez.
Alferrikakoa izan da, beraz, "inoizko gobernurik aurrerakoienak" jatekoari ezarritako zergak murriztu izana: elikagaiek garestitzen jarraitzen dute, neurria indarrean sartu eta bi hilabetera. Bistan denez, ez du elikagaien garestitzea geldiarazteko balio, eta Espainiako Gobernuaren kaltetarako izan da, zerga-bilketa gutxitu baitu. Bien bitartean, inflazioaren datu orokorrek hamarren batzuk baino ez dute egin behera; kontsolatu nahi duenarentzako. Izatez, inflazioak dagoeneko 23 hilabete daramatza Europako Banku Zentralak (EBZ) ezarritako %2ko helburuaren gainetik.
"Astakeria bat"
Mercadonako presidenteak aitortu duenez, "astakeria bat" garestitu dituzte euren produktuak. Gauzak horrela, enpresak 718 milioi euroko irabazi garbiak izan zituen 2022an, aurreko urtean baino %5,5 gehiago. Supermerkatu-kate handiak salmenta garbien zifra historikoa lortu zuen, 28.466,1 milioi euroraino iritsita. %11 gehiago, elikagaien garestitzearen urtean zehar. Balio Erantsiaren gaineko Zerga (BEZ) eta guzti, enpresak 31.041 milioi euroko diru-sarrerak izan zituen.
