Astelehen honetan, abenduaren 23an, Pedro Sanchez buru duen Espainiako Ministroen Kontseiluak neurri sorta bat onartu du, dieselaren gaineko zergak igotzeko eta elikagaien gaineko BEZari ezarritako jaitsierak kentzeko. Dieselaren gaineko zergaren igoeraren helburua da erregai horren fiskalitatea gasolinarenarekin parekatzea, eta igoerak sektorerik pobretuenei eragitea espero da. Joan den ostiralean, Espainiako Estatuari eskatu zion Bruselak Europako funtsen bosgarren ordainketa desblokeatu dezala, eta eskaera horri erantzuten dio aipatutako neurriak. Gobernuak espero du oztoporik gabe onartzea Parlamentuan.

Elikagaiei BEZa jaisteak oinarrizko hamaika produkturi eragin die orain arte, hala nola ogiari, arrautzei, frutei eta oliba-olioari. 2025etik aurrera, ordea, berriz aplikatuko da %4ko tasa supermurriztua, gobernuak ebatzi ondoren arindu egin dela bere garaian BEZaren jaitsiera justifikatu zuen inflazio erraldoia. Neurri horrekin, gobernuak "merkatua egonkortzea" omen du helburu, "azken urteetako inflazioaren ondorioen ostean". Erreformak eragin ekonomiko handia izango du kontsumitzaileentzat, batez ere diru-sarrera txikienak dituztenentzat.

Beste neurri batzuk ere jorratu zituzten ministroen bileran, hala nola, "ezkutu antioparen" luzapena, Moncloari enpresa estrategikoetan atzerriko inbertsioei betoa jartzeko ahalmena ematen dion mekanismoa. Oraingoz, 2026. urtearen amaierara arte luzatu dute baliabide hori. 2023an behin bakarrik aktibatu zuten, aztertutako 264 operazioen artean. Azkenik, esku artean dituzten neurrien barruan, kotizatutakoaren araberako pentsioen balioa %2,8 handitzeko errege lege-dekretu bat onartuko dute 2025ean, 9,3 milioi pertsonari mesede eginez. Erabaki horiek, zerga eta gizarte arloko aldaketak barne, Sanchezen gobernuaren urtearen itxiera markatzen dute, erreforma ekonomikoen agendarekin jarraitzen baitu.