Bizkaiko merkataritza orokorraren, bai eta ehungintzako, oinetako eta larrugintza dendetako langileek ere greba burutu dute gaur, apirilak 29. Piketeak egin dituzte goizean, Bilboko (Bizkaia) Kale Nagusian zein Indautxun zehar eta 12:00etan Arriagatik abiatu da manifestazioa.
Protesta CEBEK patronalaren egoitzan amaitu da, lan-hitzarmen berria exijituz. Izan ere, negoziazioa ireki zuten arren, "inmobilismoa" nagusitu da patronalaren aldetik eta, gainera, negoziazioetan "elementu erregresiboak" proposatzera iritsi zela salatu dute beharginek.
Hala, patronalak jarrera ezkorra "baztertzea" espero dute sindikatuek, langileen eskaerak txertatzearekin batera. Halere, datozen greba egunen beharra azpimarratu dute, zeinak maiatzaren 6an zein 13an deitu dituzten langileek.
