Bizkaiko gasolindegietako langileek greba egingo dutela adierazi dute, patronalak euren aldarrikapenak onartu ezean. Izan ere, lan-itun berriaren negoziazioak blokeatuta daude, langileen eta enpresen arteko desadostasunak handiak baitira. Hala, beharginek abenduaren 1etik 5era greba egitera deitu zuten joan den asteazkenean, azaroaren 16an.
Patronalaren eta langileen arteko talkaren zio nagusia soldaten igoera da. Ordainsariak Kontsumorako Prezioen Indizea (KPI) bezainbeste igotzea da langileen eskaera; izan ere, 2019an aurreko hitzarmena amaitu zen eta, ondorioz, soldata ez da egungo inflazio-maila handietara egokitu.
Sindikatuek, horrela, langileen soldata inflazio-indizeari egokitzea eskatzen dute —%7,3koa izan da inflazioa urrian—. Halaber, sektoreko enpresen "etekin ikaragarriak" seinalatu dituzte.
