Langile bat eraila Abanto-Zierbenan, urteko hogeita hemezortzigarrena gutxienez

Behargin bat erail dute gaur Abanto-Zierbenako enpresa batean, 10:00ak aldera. Metalezko habe batzuek hartu dute azpian, garabi bat manipulatzeko lanetan ari zela. Bertan zendu da 37 urteko langilea; urteko hogeita hemezortzigarrena, gutxienez.
Argazki Nagusia
2019ko azaroaren 15a

Gaurkoa ere gorriz margotutako eguna da gurean. Gaur goizean, azaroak 15, beste langile bat erail dute Abanto-Zierbenako (Bizkaia) enpresa batean, soldatapean lanean ari zela. Garabi bat manipulatzeko lanetan murgildu da 37 urteko behargina, eta metalezko habe batzuek hartu dute azpian.

Osasun-zerbitzuak bertaratu dira San Lorenzo auzoan kokatutako lantokira, baina beranduegi zen dagoeneko. Bertan zendu da langilea; urteko hogeita hemezortzigarrena, gutxienez.

Iruñeko (Nafarroa) Benecke Kaliko enpresan zenbatu zuten azkeneko erailketa, Euskal Herrian. Azaroaren 8an izan zen; 46 urteko langile bati bihotzekoak eman zion, eta zerraldo erori zen lurrera. Unean bertan hil zen.