Langile bat eraila Iruñeko Benecke Kaliko enpresan, urteko hogeita hamazazpigarrena gutxienez

Lanean ari zela bihotzekoak emanda hil zen behargin bat ostiralean, Benecke Kaliko enpresan. Lankideek bi orduko lanuztea egingo dute astelehenean, eta mobilizazioak antolatu dituzte erailketa salatzeko. 46 urte zituen hildako langileak.
Argazki Nagusia
Benecke Kaliko enpresako langileen elkarretaratze bat. Argazkia: Diario De Navarra
2019ko azaroaren 09a

Atzo, ostirala, ezbeharra izan zen Iruñeko (Nafarroa) Benecke Kaliko enpresan. Soldatapean lanean ari zela, bihotzekoak eman zion 46 urteko langile bati, eta zerraldo erori zen lurrera. Bertan zendu zen. Azken erailketa honek hogeita hamazazpira igo du, aurten, soldatapean lanean ari zirela hildako langileen kopurua.

Benecke Kalikoko beharginek bi orduko lanuzteak deitu dituzte astelehenerako, hilak 11, haien lankidearen erailketa salatzeko. Mobilizazioak ere iragarri dituzte.

LAB, AITBK, UGT eta ELA sindikatuek osatzen duten enpresa komiteak salatu duenez, "lan baldintza txarretan" aritzen dira lantoki horretako langileak: "Sarritan ez dute atseden hartzeko denborarik; lan erritmoa itogarria da, eta presio askorekin egiten dute lan". Sindikatuen arabera, bihotzekoak eman izanak lotura zuzena du lan baldintza horiekin.