Espetxetik baldintzapean irteteko eskaera ukatu diote Urrutikoetxeari

Josu Urrutikoetxearen aurkako prozeduran izan diren hutsegiteak zein bere osasun egoera mahaira atera zituzten abokatuek, baina Parisko Dei Auzitegiko estradizioen instrukzio ganberak atzera bota du preso politikoa baldintzapean aske uzteko eskaera.
Argazki Nagusia
Josu Urrutikoetxea preso politikoa.
2019ko irailaren 12a

Josu Urrutikoetxeak preso jarraituko du Parisko La Santé espetxean, Frantziako Estatuko epaitegiek bere aurkako bi euroaginduak eta bi estraditazio eskaerak bideratu bitartean. Preso politikoaren abokatuek mahaira atera zituzten bere aurkako prozeduran izan diren akatsak zein bere osasun egoera larria, baina Parisko Dei Auzitegiko estradizioen instrukzio ganberak ez du onartu prozedura baliogabetzea eta Urrutikoetxea baldintzapean aske uztea.

Duela gutxi egin diote ebakuntza presoari, prostatan. Medikuarengana bidean zela atzeman eta espetxeratu zuten duela hiru hilabete, ekainaren 19an, ministerio publikoak aginduta. Ordu batzuk lehenago utzi zuen aske Parisko Dei Auzitegiak, kontrol judizialpean.