64 urteko langile bati, metalezko pieza bat jausi zaio gainera Erandioko Murueta ontziolan. Leitzako abeletxe batean, bestalde, intoxikatuta hil da 74 urteko behargin bat.
Murueta ontziola. ARGAZKIA / hiruka.eus
Atzo, gutxienez bi langilek galdu zuten bizia Euskal Herrian lan-istripuz; Leitzan (Nafarroa) eta Erandion (Bizkaia), hain zuzen ere. Goizean izan zen Leitzako lan-heriotza: minda hobi batean lanean ari zela, intoxikatuta hil zen langile bat. 74 urte zituen. 46 urteko lankide bat, gainera, ospitalera eraman behar izan zuten, intoxikatuta bera ere.
Arratsaldeko aurreneko orduan, Erandion (Bizkaia) eman zuten lan-heriotza baten berri, Murueta ontziolan. Itxura denez, metalezko pieza batek azpian hartu zuen behargin bat, eta momentuan hil zen. 64 urte zituen, eta azpikontratatutako enpresa batentzat, Ainar S.L. enpresarentzat, aritzen zen soldatapean.
Urtea hasi zenetik, Euskal Herrian, gutxienez 53 langilek galdu dute bizia soldatapean lanean, lanera bidean edo lanetik bueltan.
