Arrasateko emakume bat erail du haren bikotekideak

Kanaria Handiko Galdar herrian izan da hilketa, abendu amaieran. 66 urteko emakume arrasatearra hil eta gorpuzkiak lurperatu zituen haren bikotekideak.
Argazki Nagusia
2021eko urtarrilaren 1a

Goiena-k jakinarazi duenez, hildako emakumearen lagun batek abenduaren 30ean jarri zuen salaketa, haren berririk ez zuelako. Poliziak zenbait gorpuzki topatu zituen bizitoki batean eta, desagertutako emakumearenak izan zitezkeelakoan, haren bikotekidea atxilotzeko agindua eman zuen. Dena den, gizonezkoa hurrengo egunean aurkeztu zen polizia-etxean; bezperan aitortu zion gertuko pertsona bati emakume arrasatearra erail zuela eta bere bizitokitik hurbil lurperatu zituela gorpuzkiak.

2020. urtean gutxienez lau izan dira, indarkeria matxista tarteko, Euskal Herrian erailak izan diren emakumeak. Kanaria Handiko Galdar herrian gertatu den hilketa berri honekin, ordea, bost dira, amaitu berri den urtean, biolentzia matxistaren ondorioz bizia galdu duten Euskal Herriko emakumeak.