Huste arriskuan jarraitzen dute Berangoko (Bizkaia) Otxantegi Herri Lurrek. Izan ere, desalojorako beste egun bat ezarrita dago jada: apirilaren 18a. 2023ko azarorako zegoen finkatuta birjabetutako landa-eremuaren hustea, baina hura geratzea lortu zuten erresistentzia egiteko asmoz bertaratu ziren lagunek.

Ertzaintza eta batzorde judiziala joan ziren Otxantegira egun horretan, baina hainbat pertsona topatu zituzten bertan. Hori zela-eta, desalojoa gauzatzeko baliabiderik ez zutela ebatzi zuten Poliziak eta batzorde judizialeko kideek, eta alde egin zuten. Hurrengo astekoa, beraz, lurrak husteko bigarren saiakera izango da.

Hiri Antolamenduko Plan Orokorraren (HAPO) barruan, 2.300 etxebizitza baino gehiago eraiki nahi dituzte Berangon, eta horri lotuta dago Otxantegiren desalojoa. Bertako kideek salatu dutenez, euren jardunari ekin ziotenetik, 1.000 eurotik gorako isunak jasan dituzte jada; azkena, iazko ekainean hirigintza-espekulazioaren kontra egindako manifestazio batengatik.