Eraso batek Magdeburgoko (Alemania) Gabonetako merkatua astindu zuen aurreko ostiralean, Saudi Arabiako 50 urteko psikiatra batek, Taleb Al Abdulmohsen, jendetza harrapatu baitzuen kotxez: 400 metro baino gehiago egin zituen jendea aurretik eramaten, Poliziak atxilotu aurretik. Azken datuen arabera, bost pertsona hil zituen eta 200 zauritu daude, horietatik 40 larriki.

Al Abdulmohsen 2006tik bizi da Alemanian, eta Islamarekin kritikoa den musulman ohi apostata bat da. Hasieran uste bazen ere ez zuela lotura edo motibazio politiko argirik, ikerketek agerian utzi dute eskuin muturraren eta Alemaniarako Alternatibaren (AfD) jarraitzaile aktiboa dela. Reuters-en iturrien arabera, Saudi Arabiako inteligentzia-zerbitzuek jada ohartarazi zituzten Alemaniako agintariak erasotzailearen jarduerei buruz, baina badirudi inteligentzia-zerbitzu federalek ez zietela jaramonik egin.

Erasotzaileak argi eta garbi adierazi izan die babesa eskuin muturreko figurei, hala nola Alex Jones podcaster estatubatuarrari, Tommy Robinson ekintzaile britainiarrari eta Elon Musk enpresariari. Al Abdulmohsenek esan izan du "benetako konspirazioak" direla "immigrazio-politika eta Europaren islamizazioa". Eta, bere sare sozialen bidez, musulmanen eta immigrazioaren aurka egiten du sutsuki.

Ostiraleko erasoak tragikoki gogorarazten du Berlinen 2016an gertatutakoa, Gabonetako merkatuan izandako antzeko atentatu batek hamabi hildako utzi baitzituen. Azken erasoaren tamaina dela-eta, Alemaniako agintariek ikerketak areagotu dituzte Polizia Federalaren laguntzarekin. Gertatutakoari lotuta, polizia-dispositiboak indartu dituzte Gabonetako merkatuetan eta, oro har, espazio publikoan.