Abenduaren 3an epaiketa izango dute Aiztondoko Gazte Asanbladako kideetako bik, Tolosako epaitegian. Egun Zizurkilgo Kaxilda gaztetxea den eraikinean "usurpazio arina" egitea egotzi diete, eta irailaren 24an bertan behera geratu zen auzi saioaren ondoren etorri da saio berriaren zehaztapena. "Elkartasuna adieraztera" dei eginez, epaitegiaren parean elkarretaratzera deitu dute abenduaren 3rako, 12:30ean. Bestalde, gogorarazi dute desalojo arriskuan dagoela Kaxilda.
Kaxilda gaztetxea. Argazkia: ataria.eus
Apirilean birjabetu zuten gerora Kaxilda gaztetxea izango zena Aiztondoko Gazte Asanbladako kideek. Birjabetzea dela-eta auzipetu zituzten bi militante, eta berez, irailaren 24an izan behar zuten aurreneko auzi saioa. Bertan behera geratu zen, ordea, eta orain, badu data berria epaiketak. Abenduaren 3an izango da, Tolosako (Gipuzkoa) epaitegian, eguerdiko 12:30ean. Hala, asanbladako bi kide epaituko dituzte bertan, eta Kaxilda martxan jartzeko birjabetutako lantoki ohiaren "usurpazio arina" da leporatu dieten delitua.
Egoera horren aurrean, "mota guztietako elkartasun keinuak" ongietorriak izango direla adierazi dute Aiztondoko kideek, "bailarako gazte langileek eta langile klaseak oro har hainbeste behar duen espazio aske hau denon artean defendatzeko". Hala, elkarretaratzera deitu dute epaiketa egunerako; hain zuzen, epaitegiaren aurrean ordu berean, 12:30ean.
Oztopoen gainetik, jardun militantean berresten
GEDAR LANGILE KAZETAk irailean jaso bezala, hilabeteetako ibilbide oparoaren ostean dator prozesu judizial hau. Aiztondoko Gazte Asanbladako kideek behin eta berriro salatu dituzte indar polizialen errepresioak zein EH Bilduren Udal Gobernuak ezarri dizkien "oztopo eta blokeoak". Izan ere, asanbladakoen hitzetan, Udal Gobernua eta "Ezker Abertzale ofizialeko hainbat kide" negoziaketak "borondate politiko faltaz oztopatzen" eta "asanbladako kideen jardun politikoa blokeatzen" aritu dira.
