Lan-erregulazio txosten berri bat aurkeztuko du Arcelor Mittal enpresak, 8.236 behargini eragingo diena. Gainera, 50-100 langile kaleratzeko asmoa duela ere iragarri du. Iazko abenduan jakinarazi zuen Aguraingo lantokia itxiko zuela, eta orduko hartan ere beste 54 langile bidali zituen kalera. Egun, Etxebarrin, Sestaon, Bergaran, Zumarragan eta Olaberrian ditu plantak multinazionalak.
Argazkia: El Correo
"Arrazoi objektiboak" argudiatuta, lan-erregulazio txosten berri bat aurkeztuko du Arcelor Mittal enpresaren Espainiako Estatuko zuzendaritzak. Multinazionalak estatuan dituen 11 lantegietako 8.236 langileri eragingo lieke dosierrak, tartean, Euskal Herriko altzairutegietako beharginei. Urtebeteko iraupena izango luke lan-erregulazioak, eta "enpresaren beharren arabera" joan beharko lukete lanera langileek. Beste txosten bat ere aurkeztu zuen Arcelor Mittalek, baina ukatua izan zen eta ez zen ezarri.
Horretaz gain, 50-100 kaleratze egiteko asmoa ere adierazi du zuzendaritzak. Enpresaren arabera, %46 "murriztu" behar ditu gastuak.
Iazko abenduan, Arcelor Mittalek jakinarazi zuen Aguraingo (Araba) lantokia itxiko zuela. Egun, Etxebarrin (Bizkaia), Sestaon (Bizkaia), Bergaran (Bizkaia), Zumarragan (Gipuzkoa) eta Olaberrian (Gipuzkoa) daude plantak.
