Valladolideko epaile batek El Jueves aldizkari satirikoa zigortu du, Abokatu Kristauen lobby ultraeskuindarraren presidente Polonia Castellanosen "ohorerako eskubidea urratzeagatik". Epaiak 6.000 euroko kalte-ordaina ezartzen dio aldizkariari, 2.000 eurokoa erakundearentzat eta 4.000 eurokoa bere buruzagiarentzat, 2025eko urtarrilean egindako argitalpen baten ondorioz: bertan, "2024ko kaiku" izendatu zuten Castellanos. elDiario.es-ek aurreratu duenez, ebazpenaren aurkako helegitea aurkeztuko du defentsak Valladolideko Probintzia Auzitegian.
Kasuaz arduratzen ari den epaileak, Maria Vanesa Diezek, azaldu du umorearen eta parodiaren barruan kokatzen dela erreportajearen zatirik handiena, baina azkeneko binetaren testua "bidegabeko intromisio neurrigabea" dela. Esaldi horrek amaiera ematen zion argitalpenari, esanez seinalatutako figurak "guztion ongia zikintzea" bilatzen duten "pertsona ziztrin eta berekoiak" direla. Horrek, epailearen iritziz, "gainditu" egiten du "adierazpen-askatasunak Konstituzioan babestutako eremua".
Dena den, ebazpen judizialak baztertu egin ditu Abokatu Kristauek satiraren gainerako zatien aurka jarritako kexak. Pedro Vera umorista grafikoak egin zuen erreportajea, urteko bilduma gisa. Castellanosi binetetan egotzitako esaldi parodikoak, hala nola "gogaitzen duen guztia" Zigor Kodean sartzeko eskaerei buruzkoak, iritzi satiriko baten isla legitimotzat jo ditu epaileak, "asmo iraingarririk gabeak" direlakoan.
Prozesu judizial horrek estrategia alternatibo bat erakusten du Abokatu Kristauen aldetik: oraingo honetan, bide zibilera jotzea erabaki du, zigor-arlokora jo beharrean. Izan ere, hainbat adierazpen artistiko eta kulturalen aurka aurrez jarri dituen kereilak ezerezean geratu dira sistematikoki. Aditu juridikoek adierazi dutenez, horrelako lege-ekintzek kritika mediatikoaren aurkako disuasio-efektua izatea bilatzen dute, aprobetxatuz bide zibilak bestelako egokitzapen tekniko bat eskaintzen duela adierazpen-askatasunaren lehentasun penalaren aurrean, formalki funtsezkoa den eskubide bat.
