2025eko Indarkeria Matxistaren Aurkako Egunaren atarian, Eusko Jaurlaritzak jakinarazi zuen biolentzia matxista lantzeko unitate espezifiko bat jarri zuela martxan Ertzaintzan: Emakumeen aurkako Indarkeriaren eta Berdintasunaren Unitatea. Bertara bideratutako agenteen kopuruak anekdotikoa dirudi, ordea: komisario bat arduradun modura eta beste lau ertzain besterik ez dira unitatean, Jaurlaritzak emandako datuen arabera. Ertzaintzan, guztira, 7.500 agente inguru dira gaur egun.
Tokian tokiko ertzain-etxeetan, indarkeria matxistari lotutako gertaerez soilik arduratzen diren "taldeak" daudela azaltzen du Jaurlaritzak bere web-orrian; agente kopuruari buruzko datu zehatzik eman gabe, ordea. Zenbait iturrik diote 70 bat ertzain direla denera. Iazko azaroko datuek zioten Ertzaintzak 6.223 emakume babesteko protokoloak zituela aktibatuta, indarkeria matxista zela-eta.
Gero eta gutxiago ustelkeria ikertzeko sekzioan: zortzitik seira bi urtean
Bere osaera murritzagatik arreta ematen duen beste unitate bat da ustelkeriari aurre egiteaz arduratzen dena: Ikerketa Kriminalaren eta Polizia Judizialaren alorraren barruan, Delitu Ekonomikoen sekzioak jarduten du ustelkeriari buruzko ikerketetan. Bingen Zupiria Barne sailburuak emandako datuak jaso ditu berriki elDiario.es-ek: sei ertzainek baino ez dute parte hartzen ustelkeriari kontra egiteko sekzio nagusian. 2024aren amaieran, Zupiriak berak aipatu zuen zortzi agentek egiten zutela lan unitatean, beraz, %25 jaitsi da horretara bideratutako ertzain kopurua bi urtean.
Lan horiei lotuta, lekuan lekuko komisariei laguntza emateko bi talde ditu Ertzaintzak: Zibersegurtasunean jarduten du batek eta Ikerketan besteak, zenbait azpitalderekin; iruzurrak, adingabeen aurkako sexu-delituak, eta hacking deiturikoa. Bada, 26 ertzainek soilik egiten dute lan horietan.
"Beltzak": 400 baino gehiago
Beste sekzio aski espezifiko batek, Brigada Mugikorrak ("istiluen" aurkako unitatea), askoz ere osaera zabalagoa du: 418 agente ziren 2024aren bukaeran, unitateak 40 urte bete zituenean. "Herritarren Babeserako Dibisioaren" parte izan arren, funtzio oso konkretua betetzen dute Brigada Mugikorreko "beltzek": kaleko mobilizazioetan "ordena publikoa" mantentzea, jende-multzoak "kontrolatzea", "azpiegiturak babestea", eta beste.
