Mugan atxilotu zuten atzo arratsaldean, eta badirudi gaur igaroko dela epailearen aurretik. 2017an geratu zen aske Aretxabaletako presoa.
FOTOGRAFÍA / Jon Urbe/Foku
Hego eta Ipar Euskal Herria bereizten dituen mugan atxilotu zuten atzo Zuhaitz Errasti; itxura denez, Frantziako Poliziaren kontrol batean. Aretxabaletakoa (Gipuzkoa) da preso politiko ohia, baina denbora darama Ipar Euskal Herrian bizitzen. Badirudi Angeluko (Lapurdi) Jendarmerian daukatela gatibu une honetan, baina ez dago informazio zehatzik.
Euskal Irratien arabera, gaur igaroko da epailearen aurretik Errasti. Bere gertukoek atzo esan zuten inork ez ziela jakinarazi zergatik atxilotu zuten.
2017. urtean irten zen espetxetik, zortzi urtez preso egon ostean. 2016tik Mont-de-Marsanen izan ondoren, 2017an utzi zuten Espainiako Poliziaren esku, eta Soto del Realera eraman zuten. Espainiako Auzitegi Nazionalak epaitu eta gero, baina, aske geratu zen.
